Davos la procedura stan ina dipsita da plirs onns tranter il Departement federal da l'intern DFI ed il servetsch da cumparegliaziun comparis.ch davart il quintader da premias priminfo.ch da la Confederaziun. La stad 2012 han las duas partidas suttascrit ina cunvegna nua che la confederaziun desista sin ina colliaziun directa sin las offertas da las cassas da malsauns. Uschia na duevan ils purschiders privats betg vegnir concurrenzads.
Betg sentenzia hacker
L'atun 2012 ha la revista da la Svizra franzosa «L'Hebdo» publitgà in'attatga da hacker sin priminfo.ch dal settember 2011. Iniziant da l'attatga duai esser stà in collavuratur da comparis, che n’ha betg agi en il num da comparis.
Comparis.ch ha confermà, il cumportament sbaglià dal collavuratur en ina communicaziun da medias. Sinquai ha il DFI visà la cunvegna ed inoltrà a Turitg ina denunzia penala cunter nunenconuschent.
La procedura a Turitg è vegnida sistida perquai che la procura publica n'ha betg pudì attestar enritgiment. Quai è da leger en la disposiziun da sistida da la Procura publica federala.
Denunzia penala pervi da maldiever d'uffizi
Plinavant è la procura publica da Turitg vegnida a la conclusiun, ch'il delinquent era gia enconuschent curt avant il delict, pia plirs mais avant che la cunvegna è vegnida suttascritta. En consequenza da quai ha comparis.ch inoltrà ina denunzia penala tar la Procura publica federala pervi da maldiver d'uffizi, sfalsificaziun da documents en uffizi e la violaziun dal secret d'uffizi. In collavuratur dal DFI duai avair malduvrà ses uffizi perquai ch'el haja declerà la visada da la cunvegna ed inoltrà ina denunzia, malgrà ch'el saveva ch'i saja ina interpretaziun faussa.
L'inquisiziun è ussa sistida. Comparis.ch sa senta reabilità definitivamain entras la Procura publica. Il DFI haja ditg publicamain manzegnas scriva il servetsch en ina communicaziun. Il Departement federal da l'intern ha declerà ch'el saja tematicamain adina sa tegnì vid la cunvegna. El prendi enconuschientscha che la Procura publica federala haja sistì las proceduras.
RR novitads 06:00