Il producent da biscuits e zvibac Hug è il 2019 creschì anc ina giada. Uschia ha l'interpresa da la Svizra Centrala pudì augmentar la svieuta per 3,8% sin 123,3 milliuns francs. Il volumen da producziun saja creschì per 384 tonnas sin total 9'738 tonnas, cumpareglià cun l'onn avant. Quai scriva l'interpresa en ina communicaziun da la mesemna. Cifras da gudogn na publitgescha l'interpresa betg.
La raschun per l'augment da la svieuta e da la producziun saja surtut stada la buna luna da consum en Svizra sco er ch'ins haja vendì bain ils novs products, ha ditg Andreas Hug, il co-manader da fatschenta davant las medias.
In augment da 13% haja l'interpresa pudì realisar en il sectur da gastronomia. Quai surtut cun exportar dapli turtinas da paintg satiglias. La marca Darvida saja bain er creschida, dentant betg pli uschè ferm sco mintgamai ils onns avant. E da metter tar la marca Wernli il focus sin spezialitads da biscuits, haja gidà da daventar pli ferm sin il martgà.
Ord l'archiv da SRF:
RTR novitads 11:00