En Svizra ha mintga persuna dà ora l’onn passà per products da fairtrade ina summa da 57 francs. Quai è in augment da 7,5% en cumparegliaziun cun il 2013. En tut èn vegnids vendids products da producziun faira per 467 milliuns francs, scriva la fundaziun Max Havelaar.
Ils purs da cacau han uschia pudì vender 30% dapli en Svizra. L'augment attribuescha la fundaziun Max Havelaar al program da cacau introducì l'entschatta dal 2014. Grazia a quest program hajan ils producents da tschigulatta la pussaivladad da retrair sulet il cacau ord commerzi fair e d'elavurar quel cun latg producì localmain e cun zutger. Uschia dettia ina situaziun da win-win scriva Havelaar.
