La EWZ ha augmentà sia producziun da forza idraulica en il Grischun l'onn passà, quai per passa in quart. Las ovras en il Grischun Central hajan furnì prest 700 uras gigawatt ed en la Bregaglia haja la forza idraulica procurà per bun 375 uras gigawatt, communitgeschan las Ovras electricas da la citad da Turitg.
Il gudogn da la EWZ per il 2023 munta a 370 milliuns francs, bunamain il traidubel da l'onn avant. Era per l'onn actual ed il 2025 spetgan els bunas cifras: tenor il rapport da gestiun pudess l'interpresa vinavant profitar da pretschs auts sin il martgà d'electricitad.
