L’emna vargada èn ils profets da l’aura ni ils uschenumnads «Wetterschmöcker» vegnids ensemen per preschentar las prognosas per l’enviern 2019/2020 avon ina sala plaina en il Mythenzentrum a Schwyz. E sco la tradiziun di: Dastga il retg da la davosa concurrenza far sco emprim sia prognosa.
In enviern turbulent
L’um da 92 onns – ch’è medemamain il pli vegl profet – discurra en ses pled d’in enviern turbulent. L’emprima giada dettia naiv la fin da november e l’entschatta december fin giu en las valladas. Per savair far da quellas prognosas na sto el betg magliar naiv ni mirar con agressivas che las furmiclas èn, el dovra ses cudeschets persunals. En quels notescha el dapi 50 onns co l’aura sa sviluppescha. El examinescha, fa quints ed emprova da chattar uschia in schema per l'onn suandant.
Aura dad ir cun skis
Peter Suter declera: «Durant ils firads e Silvester fai bel. Lura èsi propi temp per ils skiunzs». Il schaner mida lura l’aura ed igl è savens surtratg e fraid.
L’enviern returnia e vegn ad esser uschia sco in ch’igl ha gia dà en ils onns 70
Il favrer èsi da quintar cun blera naiv. El declera ch’i vegn ad ir pli ditg che ordinari, fin che la primavaira cumenza.
RR actualitad 07:00