Oriundamain aveva il Cussegl federal decis da laschar votar davart l'entir pachet da 8 milliardas francs. Suenter che la nova ministra da l'armada Viola Amherd ha dentant anc ina giada laschà prender sut la marella la fatschenta mida la regenza uss sia strategia.
Per il Cussegl federal èsi cler che la cumpra da novs aviuns da cumbat per maximal 6 milliardas francs è ina fatschenta da gronda muntada. La populaziun spetgia perquai era da pudair decider a l'urna davart quella. Il nov sistem cunter privels da l'aria saja pli pauc dispitaivel. Perquai duaja quel vegnir cumprà senza decisiun da principi.
6 milliardas – reacziuns da las partidas
- Memia pauc per PPS: La Partida populara svizra vul 1 milliarda dapli. Enstagl da las 6 milliardas proponidas dal Cussegl federal duain 7 milliardas francs star a disposiziun per cumprar aviuns da cumbat. Da limitar la summa sin 6 milliardas saja faus e restrenschia da cumprar ils meds da cumbat optimals, uschia il schef da la fracziun da la PPS e cusseglier naziunal, Thomas Aeschi sin dumonda.
- Memia bler per PS: La Partida socialdemocratica è da l'avis ch'il servetsch da la polizia aviatica na dovria betg aviuns da cumbat da hightech, mabain aviuns robusts e levs. I saja dischillusiunant ch'il Cussegl federal veglia dar ora fin 6 milliardas per ils aviuns, scriva la PS.
- PCD cuntenta: La Partida cristiandemocratica è cuntenta cun sia cussegliera federala Viola Amherd. En questa furma saja la fatschenta sin sin buna via da cuntanscher ina maioritad, scriva la PCD en ina communicaziun a las medias.
- PLD signalisà sustegn: Era sustegn per cumprar aviuns da cumbat per 6 milliardas francs ha ils Liberals signalisà. Impurtant saja dentant, ch'i giaja uss vinavant. Ils numnads 40 aviuns saja ina dimensiun realistica.
RR novitads 12:00+