Siglir tar il cuntegn
Inhalt

Svizra Project da telecommunicaziun: EFK n'è betg cuntenta cun la lavur

La Controlla federala da finanzas crititgescha che la contabilitad dal project da communicaziun da l'armada saja vegnida a moda manglusa. Uschia giaja la transparenza a perder.

Project da l'armada.
Legenda: Il project per modernisar la telecommunicaziun da l'armada è en in stadi d'entschatta. Keystone

Suenter che la Controlla federala da finanzas EFK ha controllà l'emprim pass dal project da telecommunicaziun da l'armada n'è ella betg dal tut cuntenta: la cumpilaziun dals custs saja manglusa e quai maina ad intransparenza. Ed er il dumber da custs total manchia. Plinavant na vegnia betg prognostitgada la fin dal project. Perquai cusseglia la EFK al Departament da defensiun, protecziun da la populaziun e sport, ch'è responsabel per il project, da surlavurar la contabilitad.

Project da telecommunicaziun

Cun il nov project vul l'armada modernisar ed extender la tecnica d'informatica e telecommunicaziun. Per il mument han ins lantschà l'emprim pass dal project: L'acquist dals bains necessaris.

Il departament ha gia reagì sin la critica ed empermess dapli transparenza areguard ils custs.

Auter partenadi extern

Er tar il partenari extern, la Ruag, è l'EFK stada sceptica. Areguard la liada da la Ruag cun la Confederaziun duain ins metter an dumonda la tscherna e betg excluder ch'in auter spezialist pudess surprender la concepziun e la planisaziun dal project. Il departament aveva argumentà la tscherna uschia, ch'ins veglia che las infurmaziuns e las savida davart il project na bandunian betg la Svizra.

RR actualitad 10:00