Siglir tar il cuntegn

Header

audio
«Suisa Zeitkapsel» – per tge vai?
Or da Actualitad dals 14.05.2024. Maletg: RTR
laschar ir. Durada: 4 minutas 16 Secundas.
cuntegn

Project «Zukunftsmusik» Scriver ina cumposiziun per en 100 onns

40 musicistas ed artists svizzers – er in'artista rumantscha –han survegnì l'incumbensa da cumponir suns e tuns per il 2123.

Tuns e suns abstracts fan part dal projet «Zukunftsmusik», ina capsla da temp a chaschun dal 100avel anniversari, che la societad svizra per ils dretgs dals auturs d’ovras musicalas (SUISA), ha festivà l’onn passà. Las ramurs da bulieus, il luar da glatschers, l’urlar da chauns, sco era musica, chors u instruments alternativs – tut quai duai vegnir conservà en ina capsla che vegn archivada en la fonoteca naziunala a Lugano. Ina copia identica vegn sutterrada en il Tessin.

Die Schachtel mit den 40 Ideen des Projekts «Zukunftsmusik»
Legenda: La stgatla cun ils 40 concepts RTR

40 musicistas ed artists, 5 ideas concretas

40 persunas èn vegnidas dumandadas per contribuir ina cumposiziun. L’unica premissa: Il concept sto avair lieu sin dus fegls da DINA4. Tut ils concepts vegnan archivads per il futur en ina stgatla – tschintg ideas vegnan dentant elavuradas a moda pli concreta. Tranter auter in project da chor cun musica da bulieus. Joy Frempong e Marcel Blatti dal duo «OY» registreschan il tun da bulieus cun sensurs e microfons d’auta frequenza e cumbineschan quels cun messadis positivs da 50 svizras e svizzers, che vegnan mess en ina cumposiziun da chor.

Sch’ins collia bulieus via sensurs e microfons cun in synthesizer tuna quai savens pli musical che quai ch’ins smina.
Autur: Joy Frempong musicista

Ils projects èn tant divers sco creativs. Quai mussa era l'idea da Ludwig Berger che registrescha il luar dal Vadret da Morteratsch. Ina ramur tuttafatg speciala, che nus na vegnin probabel betg pli ad udir en 100 onns. L’idea da cumponer insatge per il futur lascha pia viagiar la fantasia e preschenta ina sfida gnanc uschè simpla. Quella vegn da Johannes Rühl. L’etnolog da musica ha lantschà «Zukunftsmusik» il 2023.

Ins fa insatge per in temp ed in public che nus n’enconuschain betg.
Autur: Johannes Rühl iniziant «Zukunftsmusik»
audio
Martina Berther declara sia idea d'in diari auditiv
ord Actualitad dals 14.05.2024. Maletg: RTR
laschar ir. Durada: 5 minutas 16 Secundas.

Er ina rumantscha è da la partida

Martina Berther è ina da las paucas artistas che pon concretisar il project sur il concept or. La bassista ha decis da betg duvrar ses instrument principal, ma da crear in diari auditiv che conserva il mund or da sia vista. Tuns e suns da lieus nua ch’ella è gugent, lieus ch'èn remartgabels per il preschent e discurs cun ses conturn privat.

Die Bassistin Martina Berther mit dem Projekt «Zukunftsmusik» in der Hand.
Legenda: Martina Berther en ses atelier a Turitg La bassista è ina da las participantas che po concretisar ses concept. RTR
Jau vi crear in document auditiv neutral. Jau sun però conscienta da mia «bubble», che pensa sco jau.
Autur: Martina Berther musicista

L’idea dal project «Klangschatz» da Martina Berther è che la generaziun en 100 onns possia chavar ora ses stgazi auditiv e scuvrir, co che noss mund tuna oz. Il resultat duai esser ina platta da vinil accumpagnada d'infurmaziuns a scrit davart ils tuns e las coordinatas da las registraziuns da ses diari.

RTR actualitad 07:00

Artitgels legids il pli savens