Promover la cumpetenza mediala da giuvenils

En l'avegnir po la Pro Juventute porscher ad uffants e giuvenils dapli curs che tractan las medias socialas. Quai è pussaivel grazia al sustegn dal concern Google. L'organisaziun da giuventetgna ed il concern d'internet Google Svizra han lantschà ina collavuraziun da plirs onns.

Ina matta cun in talet contempla in gieu da computer. Bild in Lightbox öffnen.

Legenda da maletgs: Els èn oz omnipreschents: er gieus da computer tutgan tar la rubrica da las novas medias. Keystone

La finamira communabla da la collavuraziun da la Pro Juventute e Google duai esser, da sustegnair uffants e giuvenils per ch’els possian utilisar novas medias a moda cumpetenta e responsabla. Il tema da la cumpetenza mediala e ina part integrala dal nov plan d’instrucziun 21.

Nov test per eruir cumpetenza mediala

Per pudair promover e sustegnair il diever medial sviluppescha la Pro Juventute ensemen cun la Scol’auta da pedagogia da Sviz in nov test online. Cun l'agid dal test duai vegnir eruida la cumpetenza mediala da scolaras e scolars.

Sin basa dals resultats pon scolastas e scolasts lura adattar lur instrucziun. Il test da cumpetenza mediala duai probablamain esser accessibels a partir da l’atun 2016 e gratuitamain, scriva la Pro Juventute.

Quants daners che culan en la scolaziun d'uffants e giuvenils n'han las duas organisaziun betg publitgà. Dapi il 2012 porscha la Pro Juventute curs davart la cumpetenza da medias. Gia 1'500 curs èn vegnids realisads ils ultims 3 onns.

RR novitads 11:00