En Svizra saja enconuschent dapli da la sanadad da las vatgas che da la sanadad da la populaziun. Uschia descriva la professura ordinaria Suzanne Suggs la difficultad da survegnir datas da sanadad en Svizra. Ella perscrutescha tge facturs ch'influenzeschan l’agir da la societad e co che la communicaziun po midar il cumportament en il sectur da la sanadad.
La mancanza da datas è ina difficultad per la professiun da Suzanne Suggs. Ella è numnadamain spezialisada sin «Nudge» e «Social Marketing» en la sanadad. Davos quellas explicaziuns stat l’idea da stgaffir in ambient saun.
La finamira è che la varianta sauna daventa il standard – e la varianta main sauna svanescha betg, è dentond betg il standard.
Suzanne Suggs, ch'è era vicepresidenta da la Swiss School of Public Health fa in exempel: Sch‘ins va tar ina chadaina da fast-food ed emposta il menu d'uffants, duai la bavronda da standard esser l'aua e betg la bavronda dultscha. Quai na clauda dentant betg, ch'i dat la bavronda dultscha. Quella possian ins simplamain postar vitiers.
A quellas variantas vegn per part fatg la rinfatscha d’esser manipulativas. In argument che l’experta en chaussa na lascha valair: «Jau enconusch bleras persunas che dian che Nudging n'è betg etic. Ma jau di che da betg porscher l’opziun sauna sco simpla opziun n’è betg (etic).»