Il Cussegl federal vul promover l’innovaziun en il turissem. El propona perquai d’augmentar temporar las contribuziuns per projects dad Innotour.
Uschia vul il Cussegl federal era sustegnair la branscha turistica da sa revegnir da la pandemia da corona. Profitar dal sustegn supplementar sajan projects da digitalisaziun e per augmentar la persistenza, sco era projects per dar schlantsch ad il turissem da fatschenta ed en las citads. 20 milliuns francs duajan star a disposiziun supplementar ils proxims onns. Quai messadi va ussa en il parlament.
Sper quai vul il Cussegl federal era promover pli fitg il svilup economic da las regiuns ruralas e muntagnardas da la Svizra – quai en connex cun la nova politica regiunala. En il focus stattan projects d'infrastructura pigns che duajan profitar da sustegns finanzials à-fonds-perdu en ina summa da enfin 50'000 francs. Sco exempels numna il Cussegl federal la construcziun dad in curtin da raiver en il chantun Uri u in percurs da mountainbike en il chantun Neuchâtel. La consultaziun cuzza enfin mez october.