Il temp da chatscha stat puspè davant porta. Per chatschaders e chatschadras hai pia num: pinar satg e pac cun tut l'equipament necessari. Ma tge dovri propi per esser pront per la chatscha?
Per tuts che sentan forsa er in zic la fevra da chatscha, quels che s'approfundassan gugent dapli en il mund da chatscha u pudessan era s'imaginar da daventar chatschader u chatschadra avain qua ina survista da l'equipament il pli essenzial – ed era gist ina survista dals custs che spetgan per regla tar quest hobi da lunga tradiziun.
La patenta da chatscha
Sco pli emprim dovri natiralmain la patenta uffiziala da chatscha. Per survegnir quella ston interessads ed interessadas reussir en in examen da chatscha.
La patenta sto lura vegnir renovada mintg'onn per garantir ina chatscha confurma a las prescripziuns. Tut tenor tge furma da chatscha ch'ins vul far datti en il Grischun differentas patentas ch'ins po absolver.
- Patenta da chatscha auta: 805 francs
- Patenta da chatscha bassa: 302 francs
Quai ils pretschs per abitantas ed abitants dal Grischun. Per giasts che n'abitan betg en il Grischun ubain era persunas da l'exteriur datti differentas tariffas tar l'Uffizi da chatscha dal Grischun. Il pli char èsi per ina persuna da l'exteriur senza dimora en il Grischun: Per quel u quella custa la patenta per la chatsch'auta en il Grischun 15'486 francs.
Qua tar tut las tariffas
La buis da chatscha
Sco proxim tutga ina buis uschè fitg tar il chatschadur sco l'amen en baselgia. La buis la pli populara en Svizra vegn numnada «Repetierer». Quest model da buis che lubiss da sajettar pliras giadas senza stuair rechargiar n'è betg lubì en la chatscha grischuna. In'atgnadad da la chatscha grischuna è ch'igl è da sajettar senza magazin – in projectil e puspè chargiar.
- Models pli simpels u era occasiuns, ma tuttina fidaivels e precis, per novizs: a partir da 4'000 francs
- Models da pli auta valur, savens populars tar chatschaders cun dapli experientscha: 6'000 fin 12'000 francs
Il perspectiv da mira
Era buns chatschaders e chatschadras sa fidan da lur «zetef» – il perspectiv da mira. Era qua datti differenzas pli grondas tar il pretsch. Per in perspectiv da mira ch'engrondescha 3 fin 15 giadas èsi da quintar cun custs da 1'500 fin 2'500 francs – per sajettar sin la selvaschina sin 100 e maximalmain 200 meters. Sche la distanza è pli lunga, lura èsi scumandà da sajettar – tranter auter pervi dal caliber spezial en il Grischun.
La muniziun
Tgi ch'ha ina buis dovra natiralmain era muniziun. En il Grischun datti reglaments stricts per la muniziun. Dapi il 2016 n'èsi per exempel betg pli lubì da duvrar muniziun cun plum.
Entant che la muniziun dependa en auters chantuns per part era da la grondezza da l'animal, prescriva il Grischun in caliber d'almain 10,2 mm. Cunquai ch'i dat paucs producents da tala muniziun en Svizra, sajettan quasi tuts en il Grischun cun caliber 10,3 mm.
Cunquai ch'il Grischun prescriva quest caliber e la muniziun è uschè rara, ston chatschaders e chatschadras sajettar cun muniziun pli chara ch'ils e las collegas en l'ulteriura Svizra. La muniziun da 10,3 mm senza plum per il Grischun custa 6 fin 8 francs per patrona. Quanta muniziun ch'i dovra per ina stagiun da chatscha dependa era da l'experientscha dal chatschader u la chatschadra.
- 1 fin 4 patronas custan tranter 10 fin 30 francs
Il perspectiv
Era decisiv per avair success a la chatscha è in bun perspectiv – be ad egl pudessi uscheglio daventar pulit pretensius da chattar ils animals selvadis. Il perspectiv lubescha als chatschaders e las chatschadras d'observar ils animals gia a lunga distanza e d'esser pront en cas ch'in animal selvadi passa sperasvi.
Plinavant èsi grazia al perspectiv era bler pli lev d'identifitgar l'animal. En Grischun èsi numnadamain reglà a moda stricta tge animals che dastgan vegnir sajettads durant tge stagiun – impurtant n'è qua betg mo la spezia, mabain era la vegliadetgna u il sex da l'animal. Uschia pon ins pia plitost evitar multas che spetga chatschaders e chatschadras en cas d'ina preda sbagliada.
- Models per novizs: circa 500 fin 800 francs
- Models da classa d'auta valur: 3'000 fin 5'000 francs
Vestgadira da chatscha
Cunquai che la chatscha è in'activitad ch'ha lieu ordadora, per part cun bler moviment, èsi impurtant tge che la vestgadira è adattada – per il confort, ma la finala per buna part era per il success a la catscha.
Buna vestgadira è resistenta a l'aura e gida – grazia a la colur ed il material che fa pauca ramur – il medem temp era da sa camuflar e betg dar en egl. Impurtantas parts da la vestgadira èn per exempel ina chautscha strapatschabla, ina giacca robusta ed chalzers u stivals ch'èn resistents a l'aua.
Tut tenor qualitad e marca da la vestgadira pon ils pretschs natiralmain variar pulit. Qua dain dentant ina survista dals pretschs da media.
- Giacca: circa 400 fin 500 francs
- Chalzers u stivals: circa 200 fin 400 francs
- Chautschas: circa 150 fin 350 francs
- Chamischola: circa 70 fin 250 francs
- Chapitscha: circa 20 fin 80 francs
Tut ils pretschs èn ubain tariffas uffizialas tenor reglaments dal chantun Grischun, ubain cifras approximativas sin basa dals products da las marcas las pli frequentas.
La reportascha da chatscha
E tut quai en acziun pos vesair tar nossa reportascha da chatscha dal 2018. Là avain accumpagnà ina gruppa da chatschaders e chatschadras a chatscha. Durant 5 dis viandar, spetgar, lajegiar e sajettar.