Siglir tar il cuntegn

Proposta or da la cumissiun Pasturs duain pudair proteger la muntanera cun la buis

Nursers e nurseras duain en avegnir pudair sajettar sin lufs che attatgan lur muntaneras. Quella pussaivladad lascha la cumissiun d’ambient dal Cussegl naziunal evaluar entras l'administraziun federala. Tge manegian las uniuns d’interess da quella proposta?

L'uschenumnà «sajet da defensiun» enconuschan ins gia en Frantscha. Là han pasturs cun admissiun ubain chatschaders il dretg da sajettar sin lufs durant ina attatga sin ina muntanera. Cun quel sistem vulan ins sajettar ils «dretgs» lufs, pia quels che chaschunan donns vi da las muntaneras.

Opiniuns van ferm in ord l'auter

Da la vart da l'Uniun purila grischuna è il consentiment grond. Tar la consultaziun per l'ordinaziun da la lescha da chatscha han ins fermamain fatg reclama per quel sistem. I saja la varianta la pli simpla per sajettar ils lufs che fan donns.

Da la vart da Pro Natura è la sceptica pli gronda. Avant ch'ins emprova insatge nov duessan ins nizzegiar ils sistems actuals. Cun las leschas actualas possian ins gia sajettar lufs singuls, suenter ch'igl han stgarpà tut tenor regla tschintg ubain otg nursas.

Holzbank vor einem Baum, zwei Gewehre dahinter.
Legenda: Avair pront sco pastur il schluppet per sajettar sin lufs? Quella proposta è vegnida discutada en la cumissiun d’ambient dal Cussegl naziunal. (Maletg simbolic) Keystone

L'Uniun svizra da nursers da professiun resta precaut. Bleras dumondas sajan anc avertas, uschia per exempel problematicas d'armas, il problem da sajettar animals per sbagl. Era tgi che possia sajettar e cura na saja anc betg cler.

Co vai vinavant?

La proposta dal sajet da defensiun è uss tar l'administraziun federala. Quella consultescha sche e co ch'ins possia realisar quella varianta. Fin ch'ina proposta ord ina cumissiun vegn propi realisada, vai per regla relativ ditg. Las propostas da las cumissiun èn be in pass en l'entir process.

RTR actualitad 12:00

Artitgels legids il pli savens