Siglir tar il cuntegn

Header

audio
Propostas radicalas per la Posta svizra fa ina cumissiun d’experts
Or da Actualitad dals 24.02.2022.
abspielen. Laufzeit 1 minuta 53 Sekunden.
cuntegn

Proposta per nova strategia Brevs e gasettas be pli durant trais dis l'emna

En vista al squitsch per finanziar il provediment da basa en Svizra propona ina cumissiun d'experts independenta, da purtar ora pli pauc savens brevs e gasettas. Il rapport na persvada betg politichers grischuns.

  • Brevs datti durant trais dis l'emna, il tempo correspunda a quel da la B-posta dad oz.
  • Pachets duain vinavant vegnir purtads or sco oz, il tempo duai vegnir pli svelt e correspunda lura a quel da pachets da prioritad dad oz.
  • Gasettas na fetschia fin il 2030 betg pli senn da purtar ora mintga di, damai ch'ins haja quellas purschidas era online.
  • Quai cusseglia la cumissiun d'experts independenta, installada dal Departament federal per ambient, traffic, energia e communicaziun e dal Departament federal da finanzas.
audio
Politichers grischuns crititgeschan il rapport da la cumissiun
aus Actualitad vom 24.02.2022.
abspielen. Laufzeit 3 minutas 50 Sekunden.

Las reacziuns da la politica grischuna areguard il rapport èn unisono criticas. Per cusseglier guvernativ Marcus Caduff na resguarda il rapport insumma betg ils basegns da las regiuns periferas. Il cusseglier naziunal Jon Pult vesa la proposta da reducir la spediziun da gasettas sco inacceptabla, quai giaja per il dretg d’infurmaziun. E cusseglier naziunal Martin Candinas manegia che las propostas purtassan main prestaziuns da la Posta a las regiuns muntagnardas, e gia oz hajan quellas in internet main spert – pia in dubel dischavantatg.

Provediment da basa sto vegnir adattà

Il provediment da basa cun la Posta e servetschs da pajament derivia d'in temp nua ch'i deva anc paucas alternativas digitalas. Ils ultims onns haja la digitalisaziun e novas tecnologias dentant midà il mintgadi. Er ils proxims onns vegnia la ditigalisaziun a midar la societad. La cumpetenza ditigala da la glieud vegnia a sa meglierar e la communicaziun sco er ils pajaments vegnan nizzegiads pli ferm digital.

Ord quests motivs vegn la cumissiun independenta, installada da l'UVEK ed EFV, a la conclusiun che l'incumbensa per il provediment da basa na correspunda betg als basegns actuals. Enfin l'onn 2030 na saja questa incumbensa betg pli confurma al temp. Il provediment da basa stoppia vegnir modernisà. Quest provediment duai vegnir adattà als basegns da la populaziun e da las interpresas. In'incumbensa dal stadi fetschia vinavant senn, perquai ch'i na fiss uschiglio betg pussaivel da pudair tiers tschertas gruppas da la populaziun a moda suffizienta. Il provediment da basa restia in'impurtanta pitga per la coesiun sociala en Svizra. Ed era tscherts servetschs fisics stoppian vinavant restar per cuntanscher er gruppas vulnerablas da la populaziun.

Pli pauc savens brevs e gasettas – dapli pachets

Sco la cumissiun scriva, vegnia la communicaziun digitala ad esser fin il 2030 uschè derasada ed acceptada, ch'ins possia adattar la frequenza cun la quala brevs e gasettas vegnan distribuidas. Quai munta che brevs duain vegnir distribuidas be pli durant trais dis l'emna e ch'il tempo (E+3) correspundess uschia be pli a quel da la B-posta. Plinavant duai il rest dal monopol vegnir schlià.

Per reagir sin ils pachets ch'èn pli e pli dumandads, duai la frequenza cun la quala lez vegnan distribuids vegnir mantegnida. Il tempo duai vegnir auzà sin quel da E+1, quai correspunda al tempo per pachets da prioritad dad oz.

Plinavant vegnian medias, sco gasettas per il pli consumadas online, uschia ch'i na saja betg pli giustifitgà da distribuir quellas en furma da palpiri mintga di enfin l'onn 2030.

Daners bluts perdan muntada

Perquai ch'ils daners buluts perdan lur muntada en il traffic da pajaments, possian ins separar il provediment da basa da La Posta e quella dal traffic da pajaments. Mintga persuna en Svizra duai vinavant avair il dretg sin in conto cun las funcziuns da basa per pajar. Er duain pajaments en bar vinavant restar part dal provediment da basa, uscheditg ch'i na dat nagina alternativa digitala. Questa purschida vul la cumissiun scriver ora da nov.

Midada da la lescha da La Posta necessaria

Per pudair realisar las propostas da la cumissiun sut la direcziun da l'anteriura cussegliera dals chantuns Christine Egerszegi, sto la lescha da La Posta vegnir revedida. Il Cussegl federal duai prender uschè svelt sco pussibel ina decisiun da principi davart las directivas ch'il provediment da basa duai avair en avegnir. Suenter duai el instradar la revisiun da la lescha. En cas ch'il provediment da basa vegniss manà vinavant sco fin qua, fin il 2030, duain ils custs che n'èn betg cuverts vegnir declerads en detagl ed i fiss da preschentar al parlament in messadi davart l'indemnisaziun da quests custs.

RTR novitads 15:00

Artitgels legids il pli savens

Scrollar a sanestra Scrollar a dretga