63 novas protestas ha la Fundaziun svizra per la protecziun e la tgira da la cuntrada inoltrà l'onn passà. Bajetgs agriculs ordaifer la zona da bajegiar che vegnan remplazzads cun chasas d’ina famiglia modernas sajan in dals gronds temas, scriva la fundaziun en ina communicaziun.
L'onn avant aveva la fundaziun anc inoltrà 61 cas, la media da 10 onns è 45 protestas per onn. Tenor Josef Rohrer, in dals manaders da project da la fundaziun, haja l’augment en emprima lingia da far cun il fatg ch'els han prendì pli exact sut la marella projects nua che stallas u auters indrizs agriculs ordaifer las zonas da bajegiar duevan vegnir transfurmads en chasas d'abitar.
Cunzunt en il chantun Son Gagl dettia blers cas. Mintg'onn dettia là 80 fin 100 dumondas da spazzar bajetgs agriculs. I dettia in boom da bajegiar chasas d'ina famiglia en stil urban. Er en il Grischun è la fundaziun stada activa l'onn passà. En tut ha ella inoltrà sis protestas. Tranter auter cunter ina midada da la Via Engiadina e cunter la megliuraziun generala a Trin.
