L'Alliance Swisspass aveva lantschà Myride sco project da pilot. Myride cumpiglia in sistem dinamic, che calculescha per mintga viadi da nov il pretsch. Persunas che fan savens il medem viadi, duain pajar pli pauc cun Myride.
Las organisaziuns han plirs puncts da critica. Per l'ina dovria ins in smartphone ed ina carta d'identitad. Quai cuntrafetschia al princip che tuts duain pudair utilisar il traffic public, er uffants, persunas senza smartphone e sans-papiers. Per l'autra cuntrafetschia quai al princip, che persunas en la medema posiziun duain pajar medem bler per lur viadis. Er possia il sistem generar ulteriur traffic, er quai na saja betg giavischabel.
Er ch'il sistem rimna bleras datas sensiblas, sco per exempel datas geograficas e datas da pajaments, saja ina ristga per la protecziun da datas. Il sistem rinforzia la decisiun da las persunas per pajar a moda digitala, e la branscha da traffic public na duai betg restrenscher la libertad da decisiun da las persunas en Svizra. Ina applicaziun che fetschia in servetsch sco Myride duai plinavant esser concepì tenor il princip da spargnusadad da datas: mo il minimum da datas necessarias duai vegnir rimnà da las possessuras da las datas.