Cun ils daners dal fond duai la protecziun dals cunfins externs da la zona da Schengen vegnir meglierada e la migraziun illegala vegnir franada. Sco commembra da la cunvegna da Schengen, sto er la Svizra pajar. «Border Management and Visa Instrument» sa numna il fond che va anc fin il 2027.
Il quint il pli nov da l'Uniun europeica a la Svira è salà. Radund 300 milliuns euros sto Berna pajar total ils proxims set onns. Tar il project avant da l'UE, il fond per la segirezza interna, era quai anc pli pauc che la mesadad – numnadamain radund 138 milliuns francs per set onns.
Fond equipà pli generus
Il Secretariat da stadi per migraziun SEM scriva sin dumonda da SRF daco ch'i saja tant dapli, che la summa da la Svizra vegnia fixada cun la clav da Schengen. Quel è fixà en la cunvegna da Schengen tranter la Svizra e l'UE.
L'augment marcant haja sur tut er da far cun quai ch'il fond saja equipà a moda pli generusa che l'ultim, perquai ch'ils cunfins duain vegnir rinforzads. Il fond cumplet è dotà cun radund 6 milliardas euros. L'ultim ha custà pli pauc che trais milliardas euros.
A lunga vista profitescha er la Svizra
Er la Svizra po s'annunziar per projects che vegnan finanziads dal fond. Pertge er aviunadis cun traffic internaziunal valan sco cunfin da la zona da Schengen. Or da l'ultim fond ha la Svizra pudì retrair radund 33 milliuns euros. Tar il nov fond quinta il SEM da pudair retrair radund 50 milliuns euros, quai che fiss pli pauc ch'il dubel.
Dentant suppona il SEM che la summa vegnia sur il onns pli auta. Ins possia pia parter dal fatg che la Svizra vegnia a retrair procentualmain il medem.
Ina chaussa è clera: Cun la summa che la Svizra paja en il fond e quai ch'ella retira, paja la Svizra sut il stritg dapli. Quai è il pretsch per la protecziun dals cunfins a l'ur da la zona da Schengen da la quala er la Svizra profitescha.
La contribuziun da la Svizra ston il Cussegl federal ed il Parlament anc approvar.