Il Cussegl dals chantuns sto danovamain s’occupar cun la lescha davart la protecziun da la giuventetgna. Il Cussegl naziunal ha numnadamain tegnì ferm vi da pliras differenzas cun la Chombra pitschna.
Tranter auter insista el che la nova lescha, che duaja proteger minorens meglier da cuntegns sexuals e violents en films e gieus da video, regla er cumpras supplementaras per gieus da video ed apps – uschenumnadas micro-transacziuns. La fatschenta va uss enavos en il Cussegl dals chantuns.
Cussegl dals chantuns è encunter
Il Cussegl dals chantuns vul dentant stritgà questa regla, sco er la PPS e la PLD. I saja la respunsabladad dals geniturs sch'els lubeschan a lur uffants d'utilisar cartas da credit, di Verena Herzog (PPS/TG) en num da sia fracziun.
Ma tenor Simon Stadler dal center saja la pussaivladad da far micro-transacziuns per uffants e giuvenils schlet. Perquai ch'els èn lura entusiastic dal gieu ma il n'è mai cumplet. Quai mainia tar uffants e giuvenils tar ina dependenza.