Siglir tar il cuntegn

Header

cuntegn

Protecziun da muntaneras Mesiras immediatas per la proxima stagiun d'alp

Ils chantuns muntagnards vulan realisar la proxima stagiun d'alp mesiras immediatas en connex cun il luf. Perquai che la revisiun da la lescha da chatscha ch'il parlament ha inizià vegnia pir tractada l'auter onn, stoppian ins prender mesiras immediatas per la stagiun d'alp 2022.

Pertgirar las muntaneras cun chauns da protecziun saja pretensius e custia bler, scriva la Conferenza da las regenzas dals chantuns da muntogna. Perquai saja impurtant da definir criteris clers per la supportabladad da mesiras da protecziun sin in'alp. La supportabladad da las mesiras per in'alp ha ina gronda influenza co stgarpadas tras in luf vegnan quintadas.

Il mument èn ils chantuns vidlonder da definir tge mesiras ch'èn supportablas per tge alp. Criteris clers, coordinads cun la Confederaziun sajan impurtants era per facilitar la lavur da cussegliaziun da protecziun da muntaneras. Quella po lura sa concentrar sin las alps ch'èn supportablas.

La Conferenza da las regenzas dals chantuns da muntogna vul ultra da quai che la Confederaziun simplifitgescha marcantamain ils pass administrativs per las diversas lubientschas per sajettar lufs.

Criteris per il 2022 duain vegnir elavurads

L'Uffizi federal d'ambient scriva, sin dumonda dad RTR, ch'els elavurian sin incumbensa dal parlament ina glista da criteris per la stagiun d'alp 2022. Per quella glista vegnia l'uffizi er ad examinar las propostas da la Conferenza da las regenzas dals chantuns da muntogna. La glista valia sco agid per l'execuziun. Quai munta che chantuns che sa basan sin questa glista per definir alps nua che mesiras da protecziun n'èn betg supportablas, ageschian confurm al dretg federal.

Ils chantuns na stoppian dentant betg duvrar la glista, uschè ditg ch'els sa tegnian vid dretg federal. Per quai na stoppia l'Ordinaziun da chatscha betg vegnir adattada.

audio
Per tadlar: curt e cumpact
ord RTR Audio dals 10.03.2022.
laschar ir. Durada: 1 minuta 24 Secundas.

RTR novitads 16:00

Artitgels legids il pli savens

Scrollar a sanestra Scrollar a dretga