A partir dal 2050 na duai dar nagins carburants fossils pli tar il traffic en Svizra, pretenda il moviment. Cumenzar a rimnar suttascripziuns vulan ils iniziants dentant pir sche 20'000 persunas sustegnan il project. L'iniziativa vul tranter auter che las finamiras da la cunvegna dal clima da Paris dal 2015 vegnian fixadas en la Constituziun.
«Politica da clima è en retard»
L’iniziativa saja necessaria perquai che la politica da clima uffiziala da la Svizra saja fin ussa restada lunsch davos quai che saja necessari. L'ultim rapport dal cussegl dal clima mundial da l'october haja mussà ch’il stgaudament dal clima da passa 1,5 grads haja consequenzas gravantas, uschia ils iniziants.
Il svanir dals glatschers saja ina da las consequenzas las pli visiblas tar la midada dal clima. En las regiuns da las Alps s'augmentia la temperatura radund dubel uschè spert sco en la media globala. Glatschers e la schelira permanenta en regiuns autas contribueschia a la stabilitad da costas da muntognas che possian daventar instabilas. Sco exempel vegn numnà il Piz Cengalo sur Bondo dal qual èn sa distatgads ils 2017 radund 3 milliuns meter cubic grippa e crappa.
Uniun independenta per la protecziun dal clima
Vegnida lantschada è l’iniziativa da l’uniun independenta per la protecziun dal clima Svizra. Quella dumbra dapi sia fundaziun il 2018 radund 2’000 commembras e commembers. En il comité èn però er represchentads scienziads e represchentants da la politica da quasi tut las partidas ed organisaziuns da la natira e la protecziun dal clima.
Sustegn burgais
Sustegn na survegn l’iniziativa betg mo da politicras e politichers da la sanestra, era politichers burgais sco il cusseglier dals chantuns dal Grischun Stefan Engler cumbattan per ils glatschers.
L’iniziativa duai oravant tut era esser in instrument per far squitsch a la politica a reguard la revisiun da la lescha da CO2 en il parlament.
L’iniziativa saja ord sia vista radicala, però per far squitsch sin la politica fetscha quai da basegn. La politica da clima na saja era betg mo ina chaussa da la sanestra, quai saja in intent che giaja sur partidas ora, uschia Engler.
RR novitads 14:00