Tenor il veterinari chantunal da Berna sajan las sancziuns cunter ils purs dentant relativ pitschnas. En 56% dals cas è la summa stritgada pli bassa che 500 francs. I dettia purs che prendian en cumpra quai. Propi problematic sajan dentant ils purs che repetian adina puspè il medem. 3'550 bains purils èn vegnids chastiads en dus differents onns. Tar 869 hai dà trais chastis e 195 han survegnì mintg'onn pli paucs daners.
Er il pur da Hefenhofen ha anc survegnì subvenziuns
In cas enconuschent fa anc pli cler il problem. Sur onns aveva in pur a Hefenhofen en la Turgovia maltractà ses chavals. Il chantun ha laschà rumir sfurzadamain il bain il 2017 ed ha scursanì las subvenziuns per 109'498 francs. Quai è stà la pli auta scursanida dal 2017. Tuttina ha l'um anc adina survegnì subvenziuns: El ha gì il dretg sin 23'245 francs, quai mussian las datas da la Confederaziun.
Quasi mai vegnian las subvenziuns stritgadas cumplet. I sa tschenta la dumonda sche las sancziuns èn effectivas avunda. L'onn 2017 ha ina scursanida muntà en media a 1'097 francs. Il medem mument han ils purs dentant survegnì en media 53'000 francs subvensziuns. Tgi che na survegn naginas subvenziuns, sco quai ch'igl è savens il cas tar purs da portgs, pon be vegnir sancziunads sur chastis.
Chastis custan pli pauc che quai ch'il maltractament renda
Ma er qua sajan las summas plitost pitschnas, declera il veterinari chantunal da la Turgovia Paul Witzig. Savens sajan ils delinquents per disa da quels che tegnan memia blers portgs en ina stalla memia pitschna. Quels vegnian bain chastiads, ma la summa per il chasti è pli pitschna che l'avantatg ch'ils purs han da tegnair memia blers animals sin memia pauc funs. Qua dovria reglas pli rigurusas, di Witzig. Il tegnair animals a moda manglusa na possia betg pli render.
Maltractaders inteziunads e purs surdumandads
L'Uniun purila svizra reagescha sin la retschertga. El sustegnia cumplainamain las controllas da las autoritads per che cas da maltractaments d'animals possian vegnir sclerids. Tals purs fetschian numnadamain donn al renum da l'entira branscha. Ins stoppia dentant er menziunar che la gronda part dals purs miria bain dals animals.
En cas singuls dettia il pur che maltracteschia intenziunadamain ses animals. Pli savens dentant vesian la polizia e veterinaris chantunals scenas commoventantas sin ils bains pertutgads, dentant er da situaziuns precaras discurran els. I dettia situaziuns che purs bragian u ch'i sesian simplamain en lur auto e giajan davent, di il veterinari chantunal da l'Argovia. Tar tals purs manchian ils daners per pajar quints, els hajan problems persunals e sajan simplamain a la fin. Mintgatant dettia dentant er quels che vegnian agressivs envers ils veterinaris. Betg pauc stoppian els avair la polizia da lur vart per ir sin ils bains purils.
RR novitads 06:00
