Protecziun per requirents d'asil minorens betg accumpagnads

En cas d'in recurs na dastga il Tribunal administrativ federal betg pli pretender da requirents d'asil minorens in pajament anticipà dals custs. Quai ha decidì il Tribunal federal.

Requirents d'asil minorens en situaziun da scola en il center transitoric a Tavau. Bild in Lightbox öffnen.

Legenda da maletgs: Dapli protecziun per requirents d'asil minorens betg accumpagnads. Keystone

Uffants sin la fugia duain survegnir ina meglra protecziun en il process d'asil. Il Tribunal federal pretenda perquai uss adattaziuns dal Tribunal administrativ federal. Quel na dastga uss betg pli pretender ina calculaziun anticipada dals custs tar recurs da requirents d'asil minorens betg accumpagnads. La pratica da fin qua da pretender gia avant daners impedeschia l'access a la giustia, argumentescha il Tribunal federal.

Motiv per la sentenzia è stà in cas d'in giuvenil da 15 onns or da l'Eritrea. Sia dumonda d'asil era vegnida refusada. Ses recurs al Tribunal administrativ federal n'era betg vegnì tractà, perquai ch'el n'aveva betg pudì pajar ils custs anticipads da 900 francs.

Pratica per reducir la chargia da lavur

Il Tribunal administrativ federal aveva argumentà sia pratica cun in conclus da la anteriura cumissiun da recurs en fatgs d'asil or da l'onn 2002. Finamira dals pajaments anticipads era da sminuir ils cas da recurs ed uschia reducir la chargia da lavur dal Tribunal administrativ federal.

La lescha prevesa dentant cleramain ch'il tribunal po, sch'i dat raschuns particularas, desister da tals pajaments. Il Tribunal federal accentuescha en sia decisiun, ch'ina tala raschun saja per regla avant maun tar requirents d'asil minorens betg accumpagnads.

RR novitads 14:00