Igl è l’emprima giada che l’Uffizi federal da polizia (Fedpol) sustegna organisaziuns per proteger minoritads, sco l’uffizi scriva sin sia pagina d’internet.
Sco minoritads valan gruppas da persunas – che sa sentan colliadas tras ina moda da viver communabla, la religiun, la tradiziun, la lingua u l'orientaziun sexuala. Projects pussaivels che pon spetgar sustegn èn per exempel adattaziuns vi da bajetgs religius sco sinagogas e moscheas, che dovran ina protecziun speziala.
Priorisà la repartiziun dals daners
Il Fedpol ha pajà per fin fanadur radund in mez milliun francs, ad 11 organisaziuns che contribueschan a questa segirtad. E l’uffizi ha tenor atgnas indicaziuns stuì priorisar las dumondas – tenor ils criteris da l’urgenza, da la qualitad e da l’effizienza da las mesiras. Trais dumondas èn vegnidas renviadas.