En differents lieus en Svizra demonstreschan da novamain tschients da puras e purs. Els pretendan megliers pretschs per lur products ed indemnisaziuns commensuradas. Cumenzà han las acziuns da protesta venderdi saira a Kirchberg en il chantun Berna ed a Estavayer-le-Lac en il chantun Friburg. A Kirchberg han ils purs scrit cun radund 650 tractors il pled «dialog» sin in prà. Quai rapporta l'agentura da novitads SDA.
Ulteriuras acziuns da protesta èn planisadas ils proxims dis en la regiun da Lucerna, ad Uster en il chantun Turitg, a Gossau en il chantun Son Gagl ed en il Tessin.
La finamira da las acziuns da protesta saja da far attent als interess da l'agricultura, senza bloccar il traffic u vilentar consumentas e consuments, han annunzià ils organisaturs da las acziuns. Ultra da quai pretendan las puras ed ils purs dapli stabilitad e segirezza da planisar. Quai saja impurtant per pudair investir en lur manaschis e sviluppar vinavant quels.
Las autoritads e la polizia vegnan mintgamai informadas davart nua ch'ils purs e las puras s'inscuntran.
Suenter clom da svegliar ussa dialog
Cun in clom da svegliar han ils purs e las puras cumenzà avant intginas emnas lur protesta en Svizra. I aveva dà numerusas acziuns. Las puras ed ils purs accentueschan che la luna sin numerus bains purils saja anc adina tendida. Suenter il clom da svegliar dovria ussa in dialog sin medem nivel cun la poiltica, las administraziuns e cunzunt era cun ils grossists.