Il Cussegl federal ha tractà in palpiri che mussa pussaivladads stagiunalas da magasinar gas natiral, biogas u idrogens per segirar il provediment. Quai ha communitgà l’Uffizi federal d’energia. Il cussegl vul uss sclerir las cundiziuns generalas legalas e finanzialas per construir deposits da gas en Svizra.
In process lung
Il pli tard fin d’avrigl 2023 duain il Departament d’economia ed il Departament federal per ambient, traffic, energia e communicaziun preschentar resultats. Er la branscha duai vegnir involvida. En il focus stattan deposits stagiunals, principalmain sutterrans. La construcziun da tals indrizs cuzza da la decisiun fin a la realisaziun tenor l’experientscha tranter 5 e 10 onns.
Impurtant malgrà electrificaziun
Grazia a l’electrificaziun ed a las mesiras per spargnar energia vegnia la part dal gas natiral en il consum d’energia svizzer a sa reducir cleramain fin l’onn 2050. Per l’industria vegn gas dentant a restar impurtant. En il futur vegnia quest basegn curclà principalmain cun biogas, idrogen e gas natiral. Pussaivladads da magasinar sajan perquai impurtantas.