Siglir tar il cuntegn

Header

audio
Martin Schmid beneventa plans dal Cussegl federal per cunvegna da gas
Or da Actualitad dals 08.07.2022.
laschar ir. Durada: 2 minutas 39 Secundas.
cuntegn

Provediment d'energia Svizra vul cunvegna da gas

Il Cussegl federal vul ina cunvegna da gas cun ils pajais vischins da la Svizra. Il president da l'Associaziun svizra da l'industria da gas, Martin Schmid, è persvas ch'ina cunvegna saja la dretga via ed er en l'interess da noss pajais vischins.

La Svizra n'ha nagins magasins da gas, il material vegn cumprà en ils pajais vischins, sco la Frantscha, la Germania e l'Italia. Pervia da la guerra en l'Ucraina pudessi dar ina mancanza d'energia en l'Europa. Per pudair garantir il provediment en cas stretgs da gas, vul il Cussegl federal fixar ina «cunvegna da solidaritad» cun noss pajais vischins.

Jau hai buna speranza ch'il Cussegl federal po inoltrar ils interess da la Svizra e po demussar ch'el agescha er en l'interess dals pajais vischins.
Autur: Martin Schmid president da l'Associaziun svizra da l'industria da gas

Cunvegna cun la Frantscha

Cun ils vischins en il vest ha la Svizra gia dapi in temp ina cunvegna pertutgant il gas. Quai stoppia ins ussa copiar ed adattar per la collavuraziun cun la Germania e l'Italia, di il president da l'Associaziun svizra da l'industria da gas, Martin Schmid. I giaja per quai, ch'il gas cumprà vegnia alura era propi furnì en Svizra. Ina collavuraziun saja er en l'interess dals pajais vischins, perquai che la Svizra possia contribuir lur part per la segirezza dal provediment da gas.

Lingia da transit en Svizra

Tras la Svizra datti ina lingia da gas da transit che maina dal nord en il sid, pia da la Germania en l'Italia. Quella colliaziun da gas è da muntada centrala, perquai che l'Italia è dependenta da quella lingia da transit. Auter che la Svizra èn ils pajais vischins fermamain dependents dal provediment da gas, perquai ch'i vegn era producì electricitad en ovras d'energia da gas.

RTR actualitad 12:00

Artitgels legids il pli savens