La sonda èn ils delegads e las delegadas da la PS Svizra sa radunads a moda virtuala – per discutar il vegnir vegl en Svizra. Il palpiri da posiziun approvà pretenda bunas rentas, e pretschs pajabels per la tgira, l’accumpagnament e prestaziuns medicinalas ch’èn qualitativ bunas.
Gist la pandemia da corona haja mussà il basegn per ina politica da vegliadetgna solidarica, scriva la partida en il palpiri. Perquai vul la PS metter la AVS en il center dal provediment, sco la copresidenta da partida Mattea Meyer ha ditg. Els vesian il basegn da metter damain paisa sin la segunda pitga instabila – e persuenter rinforzar l’AVS solidarica.
Dus projects-clav dal provediment da vegliadetgna tracta il parlament a Berna quest onn. I sa tracta da las fatschentas per stabilisar l’Assicuranza per vegls e survivents AVS – e la refurma da la segunda pitga.