Davent ils 22 da zercladur valan suandantas schluccadas:
- La distanza minimala tranter duas persunas vegn reducida davent da 2 meters sin 1,5 meters.
- Occurrenzas cun enfin 1'000 persunas èn puspè pussaivlas.
- En ustarias na vala nagina obligaziun da seser pli.
- I na vala nagina ura da polizia pli per discos e clubs da notg.
- Mesiras d'igiena e da distanza èn dentant anc adina da resguardar.
Sper quellas schluccadas, fa il Cussegl federal anc entginas recumandaziuns:
- I na dat negina recumandaziun pli da far homeoffice. La decisiun schai tar ils manaschis. Era persunas periclitadas pon turnar enavos al plaz da lavur, duaian dentant vegnir schurmegiadas.
- En il traffic public vegn recumandà da purtar ina mascra, sch'ins na po betg tegnair en distanzas.
- Per occurrenzas: Il Cussegl federal recumonda da sparter grondas occurrenzas en secturs. Tar occurrenzas cun plazzas da seser da schar adina in plaz vit. Sche tegnair distanza n'è betg pussaivel vegn recumandau da rimnar las datas da contact.
Co vai en general vinavant cun occurrenzas?
Sulettamain tar occurrenzas vala pia anc ina restricziun. Sche la situaziun sa meglierescha vinavant pudessan occurrenzas grondas, cun tegnair en tschertas mesiras, puspè esser pussaivlas davent dal settember. Davent da damaun èn protests politics puspè lubids senza restricziuns da dumbers da participants. Là vala dentant in obligatori da purtar ina mascra. Tar occurrenzas sajan ils participants obligads d'inditgar las datas da contact, ha ditg Alain Berset. La mesira impurtanta saja anc adina tegnair distanza, sche quai na saja betg pussaivel lura vala purtar ina mascra u inditgar datas.
«Bainvegnids en il federalissem»
La cumpetenza è ussa puspè tar ils chantuns, uschia Alain Berset. Sche las cifras da cas creschan pon ils chantuns prender mesiras. Ils chantuns han la pussaivladad da serrar stizuns u entiras regiuns. La finamira è dentant ch'i na vegnia betg uschè lunsch. Tenor Berset saja impurtant dad adina mirar il context da la situaziun.
Daco 1,5 enstagl da 2 meters distanza?
Tenor Cusseglier federal Alain Berset saja la nova distanza minimala ina distanza simbolica. Ina distanza dad in meter saja normalitad. La nova distanza simbolisescha pia: la situaziun lubescha da minimar distanza, dentant betg da returnar dal tut tar la normalitad.
Procedura da consultaziun
Chancelier federal Walter Thurnherr infurmescha ch'il Cussegl federal ha avert ina procedura da consultaziun per ina lescha da pandemia. Questa lescha vegniss a remplazzar las ordinaziuns da corona. La consultaziun è scursanida per che questa fatschenta po vegnir tractada dal parlament durant la sessiun d'atun.
Il Cussegl federal ha infurmà davart la nova gronda schluccada dals 22 da zercladur. Da la partida eran:
- Presidenta da la Confederaziun Simonetta Sommaruga - Departament federal per ambient, traffic, energia e communicaziun
- Cusseglier federal Alain Berset - Departament federal da l'intern
- Chancelier federal Walter Thurnherr