Siglir tar il cuntegn

Header

video
Il Cussegl federal ha annunzià ulteriurs pass enavos en la normalitad
Or da Telesguard dals 20.05.2020.
laschar ir
cuntegn

Proxima schluccada Servetschs divins puspè lubids a partir dals 28 da matg

Las pli impurtantas decisiuns en curt:

  • Servetschs divins e messas pon puspè avair lieu a partir dals 28 da matg. Las cuminanzas religiusas ston perquai elavurar concepts da protecziun.
  • Il cussegl federal ha decidì ina finanziaziun supplementara da 14,2 milliardas francs per l'assicuranza cunter la dischoccupaziun.
  • Il Cussegl federal vul segirar l'access a vaccins cunter il coronavirus: Il Departament federal da l'intern duai contractar cun ils producents e furniturs. La Confederaziun quinta cun custs da radund 300 milliuns francs.
  • La Confederaziun sustegna instituziuns per la tgira d'uffants che han patì pervi da la crisa da corona.
  • Il Cussegl federal ha stgaffì la basa legala per la SwissCovid-App ed ha tramess ina midada urgenta da la lescha d'epidemia per mauns dal parlament.
  • A partir da l'entschatta zercladur vala per il persunal da sanadad puspè ils normals temp da pausa e ruaus.

Servetschs divins puspè ils 28 da matg

Dapi trais emnas sa chattian nus en la fasa da schluccadas, ha declerà Alain Berset. Las cifras d'infecziuns actualas sajan bunas. Ins stoppia dentant vinavant far attenziun. Per ils servetschs divins ed er per festas sco nozzas, èsi uss gia in'emna pli baud puspè pussaivel da vegnir realisads. Ils concepts da protecziun stoppian dentant vegnir resguardads.

Per servetschs divins ed autras occurenzas religiusas sco era sepulturas sto vegnir definì in organisatur. Sch'i na dat nagina garanzia che las distanzas pon vegnir resguardadas, vala dasper las mesiras dal concept:

  • L'organisatur sto survegnir da tut ils participants, num, prenum e numer da telefon.
  • El sto pudair metter a disposiziun la glista da preschientscha al chantun en cas che quel dumonda. Quai per pudair identifitgar en cas las persunas.
  • El na po betg duvrar las datas da la glista da preschientscha per in'auter intent. Suenter 14 dis èn las datas da stizzar.

Distgargiar assicuranza cunter la dischoccupaziun

190'000 interpresas han annunzià lavur curta per 1,94 milliuns lavurers e lavureras. Quai èn 37% da tuttas persunas che lavuran en Svizra. Questas cifras sajan istoricas, ha declerà il minister d'economia Guy Parmelin. Quai haja er chaschunà che l'assicuranza cunter la dischoccupaziun saja fitg svelt vegnida en ils daivets, uschia Parmelin. Quai, suenter ch'ella saja stada l'entschatta da quest onn l'emprima giada senza daivets.

video
Parmelin: «Questas cifras èn istoricas, deplorablamain»
Or da News-Clip dals 20.05.2020.
laschar ir

Senza ina finanziaziun supplementara, saja l'assicuranza cunter la dischoccupaziun la fin da quest onn 16 milliardas en il deficit. Uschia vegnia activà il frain a l'indebitament. Quai muntia ch'er ils procents da paja stuessan vegnir augmentads per almain 0,3%. Quai vul il Cussegl federal evitar e propona perquai al parlament da finanziar supplementarmain l'indemnisaziun da lavur curta cun in credit da 14,2 milliardas.

Pass per pass davent da las prestaziuns d'agid

Las finanzas da la Confederaziun sajan strapatschadas. Perquai ha il Cussegl federal decidì da bajegiar giu pass per pass da las prestaziuns d'agid. I pudess dentant er esser che quellas vegnian puspè introducidas, tut tenor svilup da la situaziun.

  • Per patruns va a fin il dretg sin lavur curta per a fin matg.
  • Lavur curta per emprendists va er a fin la fin da matg.

Las autras mesiras restan en funcziun fin la fin avust.

Dumonda per vaccin po betg esser dumonda da raps

La Svizra haja reagì relativamain svelt ed haja cumenzà cun la lavur. I dettia differents projects per vaccins giajan gia en Svizra. Perquai saja il pajais tschentà si bain.

La WHO tractia l'access als vaccins. Collavuraziun saja fitg impurtanta en quest connex. Sco Daniel Koch ha declerà guardian ils producents da vaccins mintgamai ch'els vegnian repartids. Ensemen cun la WHO emprovian ins da chattar ina repartiziun uschè gista sco pussaivel.

video
Berset: «Tut ils pajais duain avair in access gist al vaccin»
Or da News-Clip dals 20.05.2020.
laschar ir

App duai vegnir fin zercladur

A partir da cura che la Tracing-app vegnia ad esser accessibla per il pievel dependia da la decisiun dal parlament. Il Cussegl federal ha fatg ina proposta e deliberà quella per mauns dal parlament. La fasa da test per l'app uess esser a fin entschatta zercladur. Durant la sessiun dal zercladur sa fatschentia lura il parlament en chaussa. Fin zercladur duai l'app esser accessibla, uschia il manader da la partiziun per la transfurmaziun digitala dal BAG. Glindesdi saja planisà in point du press specific per l'app.

RTR novitads 15:00

Artitgels legids il pli savens

Scrollar a sanestra Scrollar a dretga