Siglir tar il cuntegn

Header

cuntegn

Proximas emnas Berset quinta cun ulteriuras schluccadas

Ulteriuras schluccadas da las mesiras da corona pudessi dar en paucas emnas. Quai ha ditg il minister da sanadad, Alain Berset, en in’intervista cun la «SonntagsZeitung». Quai dentant mo, sche la pandemia sa sviluppeschia tenor giavisch.

Ina da las schluccadas pudess pertutgar il purtar mascras. Berset ha dentant er ditg ch'i saja anc memia baud da tractar Covid-19 sco ina grippa. Quai possia pir succeder, sch'il privel ch'ils ospitals vegnian surchargiads, possia vegnir sclaus.

E quai è deplorablamain il mument anc betg il cas.
Autur: Alain Berset minister da sanadad

Er sche la situaziun avess puspè da vegnir mendra, veglia il Cussegl federal desister da serradas. Dentant fissi lura in’opziun d’adattar l’obligatori dal certificat en cumbinaziun cun il contact tracing.

Nagin obligatori da vaccinar

In obligatori da vaccinar per il persunal da tgira sco en Frantscha, na vegnia betg en dumonda per il minister da sanadad. Ins veglia cun infurmaziuns pli detagliadas promover la prontadad da vaccinar. Fin il venderdi eran en Svizra 48,9% da la populaziun vaccinada dal tut. La quota è cumpareglià cun auters pajais sut la media.

Forsa tests obligatorics

Da far dapli squitsch sin persunal da tgira betg vaccinà cunter corona, n’è nagin tema per il minister da sanadad, Alain Berset. Dentant possia el s’imaginar tests obligatorics per il persunal da chasas d’attempads e da tgira. En pli ha Berset ditg ch’i saja chaussa dals spezialists da la Confederaziun da decider davart ina ulteriura vaccinaziun e betg dals producents dals vaccins. Damai che blers turnian da las vacanzas, na vegnia il Cussegl federal probabel anc betg a decider l’autra mesemna davart midadas da las mesiras da corona.

Ord l'archiv

video
Cussegl federal schlucca pli fitg che spetgà
Or da Telesguard dals 23.06.2021.
laschar ir. Durada: 2 minutas 48 Secundas.

RTR novitads 06:00

Artitgels legids il pli savens