Siglir tar il cuntegn

Header

cuntegn

Svizra Publicaziun d'in numer da telefonin vegn crititgà

Il Cussegl svizzer da la pressa crititgescha la publicaziun dal numer da telefonin da la scheffa da la Juso, Tamara Funiciello.

Da publitgar il numer da telefonin privat da la scheffa da la Juso, Tamara Funiciello, n'è betg stà endretg. Uschia crititgescha il Cussegl svizzer da la pressa la gasetta «Schaffhauser Nachrichten» e «Radio Munot». Era sch'il numer saja da chattar fitg simpel, sa tractia d'ina violaziun da la sfera privata.

Il cas stat en connex cun la caricatura da la gasetta Schaffahuser Nachrichten dals 18 d'avust 2018. Là è vegnì publitgà il numer da telefonin da Tamara Funiciello. Per far ina tala publicaziun stopp'ins pudair giustifitgar quai spezialmain e quai na saja betg stà il cas. La caricatura sco tala na saja dentant betg discriminanta.

Rapport nunprecis tar cas d'abus d'in uffant

In segund cas ch'il Cussegl svizzer da la pressa crititgescha, pertutga il «Blick» e «Blick am Abend». Questas duas gasettas hajan rapportà a moda manglusa d'in cas d'abus d'in uffant. Là saja vegnì a pled il bab da l'uffant che haja detg ch'el saja da l'avis che sia feglia saja vegnida malduvrada. El haja annunzià quai a l'autoritad per la protecziun da l'uffant e da creschids Kesb, ma quella na saja betg vegnida activa en chaussa. Blick am Abend haja dentant renunzià sin ina posiziun da la Kesb. Uschia saja il codex per schurnalists vegnì offendì.

RR novitads 12:00

Artitgels legids il pli savens