Las notgs da schelira l’avrigl han chaschunà gronds donns tar las culturas da puma en Svizra. Tar las apricosas, tschareschas e primblas saja da quintar cun perditas da racolta. Cunzunt las apricosas vallesanas sajan pertutgadas. Quai ha communitgà l’Uniun svizra da pumicultura.
Sco savens ils ultims onns, hajan ils producents lavurà cun chandailas, cun folias da plastic per cuvrir e stgaudar las plantas. Nua pussaivel hajan ins er lavurà cun autras metodas. Ma la naiv ed il ferm vent, hajan engrevgià las lavurs.
Las differenzas regiunalas sajan stadas grondas. Actualmain na saja anc betg pussaivel da stimar ils donns finanzials da la schelira. Cletg hajan ins gì cun quai che la schelira saja vegnida gia l'entschatta u mez avrigl. Là na saja la vegetaziun anc betg stada uschè lunsch, ha declerà la pledadra da l'uniun Beatrice Rüttimann.
Vallais hai tutgà ferm
Fitg ferm pertutgà da la schelira è stà quest onn il Vallais. Sco Georg Bregy da l'uffizi d'agricultura dal Vallais ha declerà a Radio SRF, sajan radund 70% da las apricosas vegnidas destruidas l'avrigl.
Ord l'archiv:
Er en Grischun han ins quest onn puspè stuì cumbatter encunter la schelira. Perquai ha il Telesguard visità ina vegna che stgauda ils fils d'arom.
