Siglir tar il cuntegn
cuntegn

Svizra Puspè: Minus 200 plazzas en la branscha da medias

Cun reducir 200 plazzas cumplainas veglia la CH Media spargnar en ils proxims dus onns 45 milliuns francs. Quai rapporta l'agentura da novitads svizra SDA tenor ina communicaziun da la CH Media.

Gasettas da la gruppa da medias NZZ e la AZ Medien sin ina maisa.
Legenda: Avegnir intschert per ils collavuraturs: Gasettas da la gruppa da medias NZZ e la AZ Medien (maletg simbolic 2017). Keystone

En ina communicaziun sin sia pagina en la rait infurmescha la CH Media ch’ella veglia «sa posiziunar per l’avegnir e metter enturn ils proxims 24 mais in program d’integraziun».

Minus 200 plazzas sin 2'200 collavuraturs

Questa annunzia signifitga per ils 2’200 collavuraturs da CH Media, che 200 plazzas cumplainas vegnan stritgadas ils proxims dus onns. Uschia vul la chasa da medias spargnar en tut la chasa 10% dals custs – en francs e raps èn quai 45 milliuns francs. La CH Media haja infurmà ses collavuraturs la gievgia avantmezdi.

Ella veglia reagir uschia sin la situaziun tendida da la branscha sin il martgà e nizzegiar il potenzial da sinergia, scriva la CH Media en sia communicaziun. Questa annunzia fa la CH Media radund sis emnas suenter ch’ella ha cumenzà sia lavur il prim d’october 2018.

CH Media: «Far tut per stgaffir clerezza per ils collavuraturs»

Dapli detagls tar la reducziun da plazzas na dettia actualmain anc betg. La chasa da medias vegnia dentant a «far tut per stgaffir uschia spert che pussaivel clerezza per las collavuraturas ed ils collavuraturs» sa lascha citar Axel Wüstmann, il CEO da la CH Media en la communicaziun.

Las persunas che perdan la plazza vegnian sustegnidas cun in plan social, rapporta l'agentura da novitads SDA.

Dapli tar la CH Media

Tar la CH Media tutgian tenor la pagina en la rait 80 marcas da medias, 2’200 collavuraturas e collavuraturs, che cuntanschian cun lur products radund duas milliuns persunas en la svizra tudestga.

Questa cooperaziun tranter la AZ Medien e la gruppa da medias NZZ è operativa dapi il prim d'october 2018.

La chasa da medias edescha tranter auter la AZ Aargauer Zeitung, il St.Galler Tagblatt e la Luzerner Zeitung, respundia dentant er portals da novitads online, applicaziuns mobilas, emetturs da radio e televisiun e stamparias.

RR novitads 11:00