Siglir tar il cuntegn

Svizra Qualitad da tgira en chasas da vegls sa reducescha

En mintga tschintgavla chasa da vegls svizra è la qualitad da tgira sa sa reducida ils davos onns.

Tgirunz ed attempada.
Legenda: Savens saja il squitsch finanzial la raschun per la reducziun da persunal qualifitgà. (maletg simbolic) Keystone

Ina evaluaziun da datas da 1'522 chasas da vegls ha mussà che bleras chasas da vegls han remplazzà persunal qualifitgà tras forzas auxiliaras. Ed en 299 chasas è uschia er la qualitad da la tgira sa reducida en ils davos quatter onns. Quai rapporta la «SonntagsZeitung».

Pli pauc persunal, dapli stress

Pli che 100 chasas da vegls han ils davos tschintg onns reducì la quota da persunal qualifitgà per 20% fin 50%. Ed en ils plirs cas senza ch'ils attempads avessan duvrà pli pauca tgira. Blers tgirunz inditgeschan uschia d'esser stressads en lur lavur. E tar ils pazients vala il principi dal ferm: Quels ch'èn fits avunda san sa metter en per agid e tgira, ils flaivels vegnian dentant savens a la curta.

Tenor il directur da l'uniun tetgala da las chasas da vegls «Curaviva» stoppia la politica perquai urgentamain agir. Uschiglio pudess la segirezza da provediment esser en privel. La raschun per la reducziun da persunal saja numnadamain savens il squitsch finanzial.

RR novitads 06.00