Siglir tar il cuntegn

Svizra Quant credibel è il Cussegl federal?

Per respunder curt e bain: la credibilitad dals Cussegliers federals è intacta. 72% dals dumandads demussan ina fidanza mesauna fin fitg auta envers la regenza svizra. Quai mussa la retschertga suenter las elecziuns federalas da l'institut gfs.bern.

In ferm center n'è betg giavischà.
Legenda: In ferm center n'è betg giavischà. gfs.bern/RTR

2 da 5 votants èn da l'avis ch'il Cussegl federal duess er vinavant sa cumponer sco enfin uss.

Stgars in terz è dentant da l'avis che la partida populara avess dabun in secund sez. Per autras variantas per la cumposiziun dal Cussegl federal hai dà be vuschs marginalas.

Tenor la retschertga è la credibilitad da tut ils 7 Cussegliers federals buna. La cussegliera grischuna Eveline Widmer-Schlumpf sa chatta sin plazza 4, suenter Didier Burkhalter, Doris Leuthard ed Alain Berset.

Malgrà che Widmer-Schlumpf è francada fitg en il champ sanester, èn ella e sia lavur politica crediblas per 44% dals votants dal PPS. 18% dals simpatisants dal PPS èn da l'avis che Widmer-Schlumpf n'è ni credibla ni il cuntrari da quai.

La situaziun actuala para tenor la retschertga d'esser cuntentaivla per ils blers votants. Sulettamain votants da la PPS sa resentan e giavischassan ina cumposiziun dal Cussegl federal cun tut las grondas partidas - quai che resultass en in secund sez per la PPS.

La retschertga

Sin incumbensa da la SRG SSR ha l'institut gfs.bern fatg ina retschertga suenter las elecziuns. Dumandads èn vegnids 1'017 persunas che han vuschà a las elecziuns naziunalas dals 18 d'october.