Mintga tschintgavla persuna en Svizra è exponida a canera da traffic. La notg èsi mintga sisavla. Il traffic n'è bain betg uschè dad aut, persuenter mulestus. E mulesta da canera è nuschaivla per la sanadad – ella po schizunt chaschunar attatgas dal cor ubain diabetes. Quai perquai che tuns mulestus chaschunas stress – lura dat il cor pli fitg, la pressiun dal sang vegn pli auta ed il flad pli svelt.
Cumbatter a la funtauna
Il BAFU, l'Uffizi federal d'ambient, n'è dentant betg cumplettamain cuntent cun las schliaziuns per evitar canera. Pli prudent fissi da cumbatter la canera directamain a la funtauna, di Mark Brink da l'uffizi. Pia betg cun be far paraids da canera e fanestras isoladas, mabain per exempel cun reducir tempo, duvrar il dretg catram sco er ils dretgs pneus, ubain guardar ch'il traffic fluctueschia bain.
Quant dad aut èsi tar mai avant chasa? – Il BAFU dat resposta
Lavurar cun canera
Tar l'interpresa Montalta èsi fitg dad aut, radund 80 decibels. Quai dovra ina tscherta protecziun da canera, di Sandro Caminada che lavura là dapi 3 onns e mez. La protecziun vegn segirada tras uregliers fatgs sin mesira, ch'èn adattads a l'ureglia. Lura sentian ins bunamain betg la canera, uschia ch'ins possia prest emblidar ella. E la canera possia er gidar: sche questa canera constanta na tunia betg sco usità, sappian ins, ch'insatge na contestia betg.
Co auda in tschorv?
Silvio Derungs da Dardin ha pers la vesida avant 10 onns. Tant pli impurtanta è l'udida uss per el. Sin ina spassegiada tras ses vitg Dardin mussa el, co el «auda» la via.
RR actualitad 07:00