Engler na saja betg il tip cosmopolit che va per il mund enturn. El saja lià cun la patria e veglia s'engaschar vinavant per il Grischun en il Cussegl dals chantuns. E las renfatschas pertutgant il cartel en l'Engiadina na sajan betg la raschun per sia decisiun cunter la candidatura, accentuescha Engler.
Nums grischuns
Auters nums che circuleschan gia per la successiun da Doris Leuthard èn tranter auter era nums ord il chantun Grischun. Uschia èn quai Mario Cavigelli ch'ha dentant ditg envers RTR da betg candidar per il post, u Martin Candinas che lascha anc avert sia decisiun. Tar ils parlamentaris vala Candinas sco politicher giuven e dinamic ed el è er enconuschent en l'entira Svizra, i dat perfin simpatias tranter las partidas ora.
Contrahents per Candinas
Sche Martin Candinas candidass per il post en il Cussegl federal, avess el divers adversaris. I vegn ditg, ch'era il cusseglier naziunal Gerhard Pfister (Zug) saja in candidat, lez refusa dentant l'idea. Auter è quai tar il cusseglier dals chantuns Pirmin Bischof (Soloturn) e las cusseglieras naziunalas Viola Amherd (Vallais) Elisabeth Schneider-Schneiter (Basilea-Champagna) – els valan era sco candidats pussaivels.
RR actualitad 12:00