Siglir tar il cuntegn

Svizra Quo vadis, Eveline Widmer-Schlumpf?

La sonda ha la PBD la radunanza da delegads. Il president da la partida Martin Landolt ha fatg allusiun envers medias, che Eveline Widmer- Schlumpf orienteschia lura da ses avegnir sco magistrata.

Eveline Widmer-Schlumpf
Legenda: Eveline Widmer-Schlumpf, tge ponderaziuns fa ella en vista da ses avegnir en il Cussegl federal? Keystone

Suenter las elecziuns resta ina gronda dumona: Co sa decida Widmer-Schlumpf? Sch'ins crai al president da la partida burgais democratica Martin Landolt, lura pudess quai gia esser la sonda uschè lunsch. Vers las gasettas «24heures» e «Tribune de Genève» ha el ditg che la cussegliera federala communitgescha probabel la sonda sia decisiun a la radunanza da delegads.

«Jau sper e crai, che dunna Widmer-Schlumpf vegn a communitgar uffizialmain sia decisiun», uschia vegn cità Landolt, senza tradir dapli. Sch'ella candidescha sco cussegliera federala sajan las schanzas intactas da vegnir reelegida, uschia ha aschuntà il president da la PBD.

Dapi las elecziuns dals 18 d'october è Widmer-Schlumpf sut squitsch, perquai che tant la PLD sco er la PPS han gudagnà vitiers sezs. Omaduas partidas han suttastritgà che la PPS haja dabun in segund sez en il Cussegl federal.

Oz, mesemna, s'inscuntra il Cussegl federal per sia seduta. Pussaivel è, che Widmer-Schlumpf communitgeschà là sch'ella candidescha anc ina giada u betg.