Siglir tar il cuntegn

Header

Il Cussegl federal dat atras las obligaziuns per la preferenza d'inigens sin il martgà da lavur.
Legenda: Il Cussegl federal dat atras las obligaziuns per la preferenza d'inigens sin il martgà da lavur. Keystone
cuntegn

Svizra Quota da dischoccupaziun duai esser soluziun

Branschas che han ina quota da dischoccupaziun pli auta che 5% duain annunziar las plazzas als uffizis da lavur. Cun quella decisiun concretisescha il Cussegl federal la realisaziun da l’iniziativa d’immigraziun da massa

Persunas indigenas dessan avair prioritad sin il martgà da lavur, quai aveva decidì il parlament il december. Il Cussegl federal vul cuntanscher quella finamira cun ina quota da dischoccupaziun. Uschè spert ch'ina branscha ha ina quota da dischoccupaziun che va sur 5% duain las plazzas libras vegnir annunziadas tar l'uffizi da lavur. Il Cussegl federal pudess adattar la quota mintg'onn tenor basegn ed era tut tenor regiun.

audio
Quota da dischoccupaziun duai esser la soluziun
ord RTR Audio dals 16.06.2017.
laschar ir. Durada: 58 Secundas.

Las plazzas duain esser scrittas ora per tschintg dis be per las persunas che èn annunziadas tar l'uffizi da lavur.Uschia pudessan vegnir occupadas 3 da 10 plazzas libras tenor il Cussegl federal. Ed era pudessan profitar 187'000 persunas che tschertgan lavur da las obligaziuns. En las proximas emnas vul il Cussegl federal trametter las ordinaziuns in consultaziun e davent dal 2018 duessan quellas ir en vigur.

Critica da la PPS e dals patruns – sindicat è cuntent

La PPS n'è insumma betg cuntenta cun las ordinaziuns dal Cussegl federal. Or dal privilegi per indigens saja uss vegni in privilegi per esters scriva la Partida populara svizra en ina communicaziun.

Las ordinaziuns dal Cussegl federal na vegnan tenor la PPS betg ad avair influenza sin l’immigraziun da massa. La partida crititgeschan oravant tut che tut las persunas che èn annunziadas tar l’uffizi da lavur han il dretg da pudair chattar ina plazza sin quella via. Annunzià sajan blers esters e betg Svizzers scrivan els enavant.

Er als patruns na plascha la soluziun proponida dal Cussegl federal betg. Il limit da 5% procuria per ina vasta obligaziun d'annunziar plazzas. L'Uniun sidicala Svizra da sia vart è entant en general cuntenta cun la proposta.

RR novitads 18:00

Artitgels legids il pli savens