Actualmain na duain las taxas da radio e televisiun betg vegnir reducidas da 335 francs sin 300 francs ad onn. La cumissiun cumpetenta dal Cussegl naziunal renviescha la proposta dal Cussegl federal. Per decider in tal pass dovria l'emprim ina revisiun da la concessiun da la SRG/SSR cun in nov mandat da prestaziun.
Questa recumandaziun al Cussegl federal ha la cumissiun per traffic e telecommunicaziun dal cussegl naziunal (KVF-N) deliberà unanimamain, sco ch’ils servetschs dal parlament han communitgà mardi. Davart l’autezza da la taxa da radio e televisiun duai perquai vegnir discutà pir suenter ina preschentaziun d’ina analisa davart l’avegnir da la SRG SSR.
Il Cussegl federal vuleva reducir las taxas sin 300 francs ad onn ed uschia franar l'iniziativa ord circuls da la PPS. Quella vul reducir las taxas en l'avegnir sin 200 francs ad onn. Ma er intgins commembers da la PPS en il KVF-N vesan quai plitost critic. Avant da quantifitgar ils meds finanzials stoppian ins discutar davart la dimensiun ed il cuntegn dal service public, è il tenor.
