Cun gronda maioritad ha la radunanza communala da Tujetsch approvà la mesemna saira il preventiv 2024. La vischnanca quinta cun in gudogn da radund 300'000 francs, tar expensas totalas da bunamain 16 milliuns francs.
Las investiziuns nettas planisadas per il 2024 muntan a radund 9,4 milliuns francs. Tranter auter tutgan tar quai ina chasa da giuventetgna, ina nova halla da deposit, la sanaziun da duas vias (2 milliuns francs) e la projectaziun d'in plazzal per il bus local a Val Bugnei. Er lascha la vischnanca revalitar ils biotops en vischnanca (150'000 francs) e dislocar auals a Dieni (600'000 francs).
Il pe da la taglia sin las entradas e da la taglia da facultad restan per il 2024 sin 95% da la taglia chantunala simpla. Era tuttina resta la taglia sin il giaschom. Omaduas decisiuns èn crudadas unanimamain, tenor il protocol.
Betg tut è vegnì tras
Refusà han las votantas ed ils votants da Tujetsch preschents a la radunanza tranter auter da bajegiar in parcadi Sum Sassi Dieni (450'000 francs) – e la chasa da gieus en la scola da Rueras (350'000 francs).
Plinavant ha la radunanza communala decidì unanimamain, che la radunanza vegn en futur mo pli protocollada en furma d'ina pitschna resumaziun da la fatschenta cun la decisiun.
Preschents a la radunanza communala èn stadas 100 persunas cun il dretg da votar. E durà ha l'entira radunanza communala dals 6 da december bunamain tschintg uras.
