Siglir tar il cuntegn

Header

cuntegn

Radunanza da delegads da PPS Marco Chiesa attatgescha Cussegl federal e las citads

Il president da la PPS Svizra Marco Chiesa rinfatscha al Cussegl federal d'avair violà ses agen pled. Las mesiras da corona che sajan «arbitraras e naivas» avessan ins gia daditg stuì abolir, uschia Chiesa en il pled d'avertura a chaschun da la radunanza da delegads en il chantun da Vad.

Gea a resoluziun davart «foss tranter citad e campagna»

La PPS pretenda da terminar ils privilegis e l'ideologia da repartiziun da las citads sanester-verdas. En il chantun da Vad han ils delegads e las delegadas da la PPS decis cun 160 Gea cunter 17 Na ina resoluziun en connex cun il foss supponì tranter citads e la campagna. Tenor la partida profiteschan ils centers urbans che vegnian regids da sanester-verd a moda massiva da differents pajaments da transfer da la populaziun da champagna ed aglomeraziun, sco era da las interpresas. Tranter auter duajan ins restabilir l’autenticitad dals custs e da la taglia tranter citadins e champagnards.

Parolas: 3 giadas Na

La PPS cusseglia da metter trais giadas in Na en l'urna tar las votaziuns dals 28 da november. Delegadas e delegads han per l'ina decis la parola Na per l'Iniziativa da tgira, quai cun 185 cunter 14 vuschs. D'esser cunter l'iniziativa na muntia betg d'esser cunter il persunal da tgira, ha accentuà la cussegliera naziunala Céline Amaudruz. L'Iniziativa da tgira promovia ch'il sectur da tgira vegnia academisà mo dad ina vart, senza meglierar la prestaziun. Perquai sustegnia la politicra da la PPS la cuntraproposta dal Cussegl federal.

La parola Na per l'Iniziativa da giustia ha ella decis cun 179 cunter 1 vusch. I na dettia nagina raschun da midar la pratica actuala. Entras l'iniziativa perdess il parlament cumplettamain l'influenza sin las elecziuns a la Dretgira federala.

Areguard il referendum cunter las adattaziuns ch'il parlament ha fatg il mars 2021 en la Lescha da Covid-19 ha la PPS gia decis l'avust la parola Na.

audio
Per tadlar: curt e cumpact
ord RTR Audio dals 23.10.2021.
laschar ir. Durada: 54 Secundas.

Ord l'archiv

video
La PPS ed ils skeptichers da corona
Or da News-Clip dals 22.09.2021.
laschar ir. Durada: 19 Secundas.

RTR novitads 12:00

Artitgels legids il pli savens