A la radunanza da delegads da la PPS è Marcel Dettling vegnì elegì sco nov president da la PPS Svizra. Dettling ch'è stà il sulet candidat suonda ad il Tessinais Marco Chiesa. Il cusseglier naziunal è da la svizra centrala, ha 43 onns ed è dapi l'onn 2022 stà vice-president da la partida.
Na a la lescha d'energia – cunter l'opiniun da Rösti
Plinavant han las delegadas e delegads a Langenthal decis la parola Na a la lescha d'energia sur la quala il suveran votescha il zercladur cun 242 cunter 149 vuschs e sis abstenziuns. Quai cunter l'opiniun dal cusseglier federal Albert Rösti. Lez ha ditg a la radunanza da delegadas e delegads che la mancanza d'electricitad saja vinavant ina gronda ristga per la Svizra. I saja impurtant che la Svizra augmenta la producziun d'electricitad, ha punctuà Rösti. Als sceptichers en las retgas da la PPS ha Rösti empermess che la lescha na lubescha betg da pudair construir tals implants nua ch'ins vul mabain ch'i vegnia fixà zonas.
Blers critichers èn s'exprimì en la debatta e teman che las cuntradas vegnan uschia destruidas e ch'ins ha uschia sco vischnanca pli pauc dretg da dir insatge. Tar ils critichers tutga er la cussegliera naziunala Magdalena Martullo che argumentescha ch'i na giaja betg mo per in pèr implants solars e da vent, mabain ch'i duvrass 9'000 da quests implants cun ina surfatscha uschè gronda sco il lai da turitg. Quai che sajan blers implants da vent e solar per pauc electricitad.
Na a l'iniziativa da premias da cassas da malsauns ed a l'iniziativa per in frain dals custs
Plinavant ha la PPS Svizra decis la parola Na a l'iniziativa da premias da cassas da malsauns – quai cleramain cun 421 cunter 9 vuschs. Ed era Na hani ditg cun 329 cunter 11 vuschs e trais abstenziuns cunter l'iniziativa per in frain dals custs.
