Ils delegads e las delegadas da la partida populara svizra han approvà ina resoluziun per la neutralitad. Quai a la radunanza da delegads e delegadas la sonda a Cuira. En la resoluziun pretenda la PPS ch'il Cussegl federal mantegia la neutralitad armada e che la Svizra porschia lur servetschs a tuttas partidas involvidas en la guerra. La partida vul ch'il Cussegl federal propona la Svizra sco lieu d'inscunter per l'Ucraina e la Russia. Tuttas pussaivladads diplomaticas duain qua vegnir nizzegiadas.
Plinavant duai la neutralitad armada vegnir mantegnida a moda consequenta e la pussaivladad da sa defender duai vegnir restabilida. Plinavant vul la PPS che la Svizra desistia da daventar commembra da la Nato ed er da la politica da segirezza e defensiun da l'UE na duai la Svizra betg far part.
Applaus per Köppel
Avant che la resoluziun è vegnida approvada, ha il cusseglier naziunal Roger Köppel survegnì standing ovations ed in grond applaus per ses referat davart la neutralitad. El ha ditg ch'il Cussegl federal haja dà si la neutralitad cun approvar las sancziuns encunter la Russia.
La PPS saja la suletta partida che s'engaschia strictamain per mantegnair la neutralitad svizra e che tractia tuttina tuttas partidas involvidas en la guerra. «Nus stain sin la vart da la Svizra», ha Köppel ditg.
Parolas per las votaziuns dal matg
A l'ur da la radunanza da delegadas e delegads, ha la PPS decidì sias parolas per las votaziuns dals 15 da matg. La partida recumonda in Gea a la proposta da Frontex, in Na per la Lex Netflix ed er in Na a la midada da la lescha da transplantaziuns.