L’iniziativa da limitaziun da la PPS è vegnida refusada unanimamain. Bandunar la via bilaterala saja in suicidi economic per la Svizra, uschia il tenor da la partida.
In NA datti era per l’augment da la deducziun per uffants sco era per la revisiun da la lescha da chatscha ed il credit per cumprar novs aviuns da cumbat. Il congedi da paternitad da duas emnas cusseglia la partida percunter dad approvar. Uschè curt sco quel saja, i saja in emprim pass en la dretga direcziun da la politica da l'egualitad.
Organ permanent per persunas «queer»
Ils delegads da la PS èn era s’exprimids en favur dad in organ permanent per persunas – ch’ins di «queer». «Queers» èn persunas che na correspundan betg a la norma etero-sexuala – per exempel omosexuals u etero-sexuals - che han pliras relaziuns il medem mument. Il nov organ duai procurar che l’egualitad valia per tuts en la PS sco era en l’entira societad.
Levrat pretenda solidaritad per ina via ord la crisa
Ordavant aveva il president da la PS Christian Levrat pretendì solidaritad ed in ferm service public per dumagnar la crisa da corona. La solidaritad che la populaziun haja mussà duai er restar suenter la fin dal stadi d’urgenza.
Levrat ha plinavant crititgà la mancanza da solidaritad da las partidas burgaisas, uschè spert ch’i na giaja betg per l’agid d’interpresas grondas. Be uschia possian ins declerar ch’ins refusia da prolungar la lavur curta en il sectur da cultura.
Persuenter ha il president engrazià al Cussegl federal per sia lavur excellenta. Il Cussegl federal haja decis da lavurar cun la populaziun e betg encunter ella. El haja decis da persvader e betg da scumandar.
Per Levrat èsi l’ultima radunanza da delegads sco president da la partida. El dat giu ses uffizi la fin d’october.