Balthasar Glättli ha manegia, sch’il clima fiss ina banca gronda avess il Cussegl federal gia daditg salvà quel. Sch’il stadi dettia 209 milliardas francs daners publics, lura stoppia ina cundiziun esser da respectar las finamiras per il clima.
Ina resoluziun che las delegadas ed ils delegads han deliberà pretenda, en connex cun la Credit Suisse – che la Svizra procuria cun reglas effizientas per ina plazza da finanzas segira e persistenta.
Lantschà cumbat electoral
La partida va cun il slogan «Nus vulain purtar ina midada en il Cussegl federal» en il cumbat per ils sezs en il parlament a Berna l’atun. Il success da las davosas elecziuns dal 2019 veglian ins purtar vinavant, ha ditg la manadra da la campagna Lisa Mazzone.
Vitiers han ils Verds fixà las parolas per las votaziuns dals 18 da zercladur. In Gea han ils delegads e las delegadas decidì per la lescha davart la protecziun dal clima. Dà liber la vusch han ins per la decisiun davart la taglia minimala globala.
