Il minister da sanadad Alain Berset ha tranter auter ludà la WHO - l'organisaziun mundiala per la sanadad. Il medem mument ha el però er appellà als stadis commembers d'investir en ina protecziun da sanadad globala. Quai saja decisiv per cumbatter la pandemia da corona. Nagin pajais saja abel da surmuntar sulet ina tala crisa.
A l'ur da la radunanza a Genevra ha Berset plinavant suttascrit cun il directur general da la WHO Tedros Adhanom Ghebreyesus ina cunvegna da cooperaziun. La finamira è da barattar svelt e transparent datas epidemiologicas durant ina pandemia. La Svizra metta a disposiziun per quest intent il labor biologic dal VBS a Spiez sco repositori per virus da Covid-19.
La radunanza annunala da la WHO a Genevra dura anc enfin l'emprim da zercladur ed ha lieu causa corona a moda virtuala.