Siglir tar il cuntegn

Header

cuntegn

Radunanzas da delegads PPS, Verds e PBD dattan in sguard enavos

La Partida populara svizra ed ils Verds decidan davart las parolas per las votaziuns dals 9 da favrer. Ed ils burgaisdemocrats sa fatschentan suenter las elecziuns naziunalas cun tge fracziun ch'els vulan sa colliar en la Chasa federala.

La Partida populara svizra ha envidà ils delegads e las delegadas a Niederglatt en il chantun Turitg. Tranter auter vai tar la PPS per analisar ils resultats da las elecziuns naziunalas, nua che la partida ha pers massivamain vuschs. En tut ha la partida pers 12 mandats en il Cussegl naziunal. Cun 53 sezs resta ella dentant la forza pli ferma.

Il manader dal cumbat electoral, Adrian Amstutz, è da l'avis, ch'ins haja simplamain mobilisà memia pauc. Plinavant sajan dispitas a l’intern da la partida daventadas publicas. Il president da la PPS, Albert Rösti, da sia vart ha ditg che la finamira principala da la partida saja vinavant d’impedir ina cunvegna da basa cun l’UE.

Ultra da quai han ils delegads da la PPS da decider las parolas davart l'iniziativa per dapli abitaziuns pajablas u davart il referendum cunter schlargiar la norma penala d'antirassissem.

Verds fan nova emprova per congedi da geniturs

Cun in gudogn da 17 mandats en il Cussegl naziunal pon ils Verds trair ina bilantscha positiva a lur radunanza da delegads a Berna. Bain avevan ils barometers d'elecziun mussà che la partida vegnia a gudagnar vuschs, in tal success n'aveva però nagin spetgà. En tut vegnan ils Verds uss sin 28 sezs.

Cun ina fracziun rinforzada vulan ils Verds promover durant la proxima legislatura ina politica sociala dal clima. En spezial vul la partida lantschar ina nova emprova per in congedi da geniturs, dapli protecziun per la biodiversitad, novas reglas per in commerzi persistent e la responsabladad da concern. A la radunanza da delegads decidan ils Verds ultra da quai las parolas per las votaziuns dals 9 da favrer.

PBD sto chattar fracziun

Ils delegads da la Partida burgais-democratica s'inscuntran questa sonda a Salenstein en il chantun Turgovia per magunar lur terrada tar las elecziuns naziunalas. Be anc trais mandats en il Cussegl naziunal èn restads a la partida. La PBD sto perquai decider ils proxims dis cun tge fracziun ch'ella vul sa colliar en la Chasa federala.

Ultra da quai ha il president da la partida, Martin Landolt, annunzià sia demissiun per l'onn che vegn. La glista da candidats per sia successiun è limitada: Sper Martin Landolt sesa er il Bernais Lorenz Hess en il Cussegl naziunal. Elegida è er vegnida la cussegliera guvernativa da Berna, Beatrice Simon. Ella desista dentant dal mandat. Pussaivel ch'il cusseglier naziunal da fin uss che n'è betg vegnì reelegì, Heinz Siegenthaler, ruschna suenter.

RR novitads 11:00