Oriundamain aveva la banca Raiffeisen planisà da publitgar oz mesemna il rapport. La raschun per il spustament saja ch'ins stoppia far adattaziuns.
Quellas sajan vegnidas necessarias suenter la demissiun dal president dal cussegl d'administraziun Johannes Rüegg-Stürm, ed ils embrugls enturn l'anteriur schef da la banca Pierin Vincenz.
Ils 24 d'avrigl vul al Raiffeisen dar giu ses rapport davart l'uschenumnada «Corporate Governance» – il sa cumportar e gestiunar da la firma.
Finma investighescha cunter la banca
Encunter la Raiffaisen marscha ina procedura da la Surveglianza federala dals martgads da finanzas (Finma). Quai pervia da mancanzas tar la gestiun da l'interpresa dapi il 2010. La Finma aveva constatà conflicts d'interess tar il management en connex cun participaziuns e transacziuns pli grondas da la banca.
A l'anteriur directur da la Raiffeisen vegn renfatschà d'avair sa profità persunalmain, cura che la Raiffeisen ha cumprà la societad da cartas da credit Aduno e la societad per investiziuns Investnet. La procedura cunter l'anteriur directur Pierin Vincenz ha la Finma bain sistì – però cuntinuà la procedura cunter la banca.
Pierin Vincenz vinavant en arrest a Turitg
Cunter l'anteriur directur Pierin Vincenz marschan entant inquisiziuns penalas, suenter che l'Aduno aveva inoltrà denunzia penala. Dapi in mais è lez en arrest d'inquisiziun a Turitg.
RR novitads 08:00
