Siglir tar il cuntegn

Header

Navigaziun

Entrada da filiala tar Raiffesen
Legenda: Radund 200 plazzas vul la Raiffeisen stritgar fin il 2020. Keystone
cuntegn

Svizra Raiffeisen stritga fin a 200 plazzas

  • La Raiffeisen ha lantschà in program da spargn - fin il 2020 vul la banca spargnar radund 100 milliuns francs
  • Ord quest motiv duajan radund 200 plazzas vegnir stritgadas
  • La reducziun duai vegnir cuntanschida tenor la banca tranter auter cun fluctuaziuns natiralas e pensiunaments anticipads

La banca Raiffeisen vul restructurar l'interpresa. Ord quest motiv ha ella lantschà differentas mesiras da spargn e restructuraziun. Fin il 2020 vul la banca spargnar radund 100 milliuns francs. Sco la banca scriva en ina communicaziun sajan maximalmain 200 plazzas pertutgadas da las midadas. Ina part signifitganta da la reducziun duai vegnir cuntanschida entras fluctuaziuns natiralas e pensiunaments anticipads.

L'onn passà aveva la terz gronda banca da la Svizra stuì magunar ina sfundrada dals gudogns. Cun 540 milliuns francs era il gudogn sa reducì per bunamain la mesadad u 400 francs. La banca aveva argumentà il minus cun rectificaziuns da la valur sin participaziuns da l'anteriur schef da la banca Pierin Vincenz.

Restructuraziun da departaments

La banca ha plinavant communitgà ch'ella introduceschia novas structuras tar ils departaments. En il futur duai dar dus novs departaments. Dat ina vart il departament «Service Banca Raiffeisen» che duai esser responsabels cunzunt per marketing e sustegn da commerzi, da l'autra vart il departament «Clientella e filialas» che duai cumpigliar tuttas purschidas da la banca en connex cun clientella.

RR novitads 14:00